ياطير ما به غيرك احد(ن) يردّه= انت الوحيد اللّي تعبر المسافات
ياطير هاك العلم وارجوك ودّه=محد(ن)سواكم يرتكي للمهمات
شد الرحال لصاحبي اليوم شدّه= وقطف على دربك من الروض وردات
ونشد على بابه قصيدي وندّه= بعذب لحون العشق من دون هنات
ابيه يطرب لك الى جيت عندّه= وابيه يفتح لك قديم الملفات
من شان تقرا ما كتب لي بيدّه= في داخل اوراقه من اهموم وآهات
والى نويت اتعود قبّل لي يدّه= وامسح على خده ووادعه بسكات
مابي دموعه تبلل اطراف خدّه=ومابيه ينثر من سبايبك عبرات
وان كان حس بقلب منهو يودّه=هوّن عليه وبلغه بالتحيات
قله تراني حافظ اليوم عهدّه=وباقي على ظنه ولو طالت اوقات