تعديل الفرامل الامامية اللانوس

08-10-2009, 10:21 AM

NEO

عضو فضي

تاريخ التسجيل: Jun 2009

المشاركات: 874

تعديل الفرامل الامامية اللانوس

اخيرا و بعد طول انتظار و بتوفيق من الله سبحانة و تعالى نجح الجزء الاول من مشروع تعديل فرامل اللانوس ال1500

احب بس اوضح حاجة... اللى انا كاتبة دة هو اللى عملتة فى عربيتى وانا بكتبة للايضاح فقط... و اللى عايز يعمل كدة يعمل على مسؤليتة الشخصية و انا مش مسؤل باى شكل من الاشكال عن اى خسائر فى الارواح او الممتلكات الناتجة عن محاولة اى شخص او جهة اقتباس التعديل دة و تطبيقة على سيارات الغير

فى البدايه معظمنا ان لم يكن كلنا عارفين ان فرامل اللانوس ال1500 مش قد كدة... البعض حس كدة و هو سايق عادى و البعض الاخر حس كدة فى مواقف صعبة و ربنا سترها... و بما ان الفرامل مش موضوع هين كان لازم افكر فى حل

لما بصيت على فرامل اللانوس لقيت انها بتعتمد على طنابير بقطر 236 مللى فقط و اكتشفت حاجة غريبة و هى ان نفس الكالبرات و التيل هما هما اللى فى الماتيز... بالتالى حسيت ان ممكن جدا يكون دة السبب فى ان الفرامل ضعيفة... اكيد الفرامل اللى فى الماتيز مهياش وحش الوحوش و بالتالى صعب عليها توقف عربية فى حجم اللانوس بامان تام... بس كان لازم اتاكد

لما سالت على فورم daewootech الناس قالت ان فرامل اللانوس كويسة على عكس اللى احنا بنحس بيه فى عربياتنا... الموضوع كان غريب فا رجعت لجدول البيانات الخاص باللانوس و لقيت فعلا ان فرامل اللانوس ال1600 اكبر من ال1500 فى كل حاجة... الطنابير و التيل و الكالبرات و حتى الماستر العمومى... طبعا واضح من الصور الفرق فى حجم الطنابير و التيل و الكلبرات اكبر 2 مللى و كذلك الماستر العمومى

بعد التاكد من ان فيه فرق كان لازم اعرف ايه امكانية تعديل فرامل الانوس 1500 عشان تبقى زى ال1600 و بعد الرجوع لكتالوج الاجزاء لقيت ان العربيتين نفس العفشة تماما و بالتالى اجزاء الفرامل فى العربيتين يركبوا على بعض لان العربيتين فيهم نفس الصرة... بداية كويسة

كان عندى مشكلتين عشان ابدا الشغل:

الاولى هى ان فرامل اللانوس ال1600 مش حتسمح ان الجنوط ال 13 تركب... لازم جنوط 14 على الاقل بس دى مش مشكلة اوى بالنسبالى لانى كنت مغير الجنوط فعلا قبل كدة و حاطت جنوط نوبيرا

المشكلة الاهم هى الاجزاء اللى حتركب لانى ببساطة مينفعش اخش محل و اقولة ادينى طنابير او تيل لانوس 1600 فا كان لازم برضة ادور على القطع دى من عربيات تانية موجودة فى مصر عشان اقدر اشتريها و اصينها بعد كدة

انا كنت محتاج ماستر عمومى 22 مللى و طنابير 256 مللى و كالبرات 19 مللى... الماستر اسهل حاجة لانة ماستر النوبيرا بس دة انا ماجلة شوية لانى عارف انة كدة كدة حيركب المهم باقى الحاجة حتركب فعلا ولا لا

الكالبرات: اول حاجة جبتها كانت كالبرات بتاعت نوبيرا و هى فعلا 19 مللى بس البراكت اللى الكالبر راكب علية ميركبش على صرة اللانوس و بالتالى اضطريت ارجعة و اجيب كالبرات بتاعت لانوس 1600 اللى هى هى كالبرات الدايو السبيرو... الكالبرات جبتها استيراد من يوسف اللى فى الحرفيين ب 250 جنية من يجى سنة

الطنابير: اخدت طقم طنابير نوبيرا من واحد صاحبى و خرطتهم و بقوا زى الفل بس للاسف مركبوش... صحيح هما 256 مللى زى بتوع اللانوس بس طلع الفرق ان طنبورة النوبيرا اكبر ب 5 مللى فى المسافة من سطح الطنبورة اللى راكب علية الجنط لحد السطح المواجة للمساعد... الفرق دة خللى الطنبورة تحك فى المساعد و منفعتش خالص

المهم اضطريت ادور على طنابير تنفع للعربية من عربيات تانية و كان اول حاجة لقيتها هى طنابير الافيو... الطنابير هى هى بالضبط فى كل المقاسات بس المشكلة فى السعر... 450 جنية للجوز و دا مبلغ عالى جدا بس كان هو الحل الوحيد... طبعا لان مكنش معايا فلوس للقصة دى فا طنشت كام شهر و لما سالت تانى كان سعرهم نزل الى 350... برضة كتير

اللى خللانى استعجل فى التعديل كان شوية مشاكل فى الفرامل بتاعت العربية لانها كانت محتاجة تغيير طنابير و استحرمت اشترى طنابير جديدة و انا كدة كدة حغير النظام اصلا فا رحت جبت طنبورتين لانوس 1600 استيراد... منها ابقى حليت مشكلة الفرامل و منها ضامن اللى اشتريه يركب صح بدون مشاكل... مش حقول دلوقتى احساس الفرامل ايه... خلية فى الاخر

بعد بحث على سايت بريمبو لقيت ان نفس الطنابير دى مشتركة بين اللانوس ال 1600 و الدايو السبيرو و الاوبل الفكترا فا كان عندى مجال اوسع للبحث و اسفر عن التالى:
طنابير فكترا ماركة بريمبو: 280 جنية
طنابير سبيرو صناعة كورى 250 جنية
طنابير سبيرو SK الماتى: 180 جنية

طبعا رحت للاختيار الارخص عشان الفلوس و جبت الطنابير الالمانى لان الطنابير الاستيراد كان فيها ريجة خفيفة و مكنتش عايز اخش فى حوارات خراطة و خلافة

التيل: دا كان اسهل ما يمكن... تيل نوبيرا... انا بدات بالتيل التركى المستعمل اللى كنت واخدة مع طنابير النوبيرا و لما ركبت الجديد جبت تيل جولد

يوم الخميس اللى فات كنت مع صديقى مصطفى صاحب الاختراعات و قررنا نعمل التعديل و احنا واقفين... لبست انا و هو الافرولات و بدانا الشغل... الموضوع كان سهل و بسيط بس النتائج رائعة و الحمد لله

ما شاء الله الفرامل تحولت لحاجة تانية... الاحساس دلوقتى انك معاك فرامل و كل ما تدوس اكتر العربية بتفرمل اكتر و بتقف اسرع... حتى لما يبقى معاك ناس فى العربية الفرامل قوية بما يكفى انها توقفك بامان... مننساش برضة ان الكاوتش الاعرض عامل شعل مع الفرامل

لما جيت اشيل الطنابير الاستيراد و احط الجداد كنت ماشى بتاع 3000 كيلو و كان التيل متاكلش كتير... فى الفرامل القديمة كان 3000 كيلو يخلصوا نص التيل... ساعات كتير تقرص على الفرامل فا التيل يطلع ريحة شياط... الموضوع دة انتهى تماما و كانت الحرارة بتضعف كفائة الفرامل بشكل كبير جدا... دلوقتى الفرامل الجديدة بتستحمل الاجهاد الحرارى و تفضل محافظة على كفائتها

الحقيقة من وسط التعديلات اللى عملتها على العربية دة التعديل اللى اتبسط منه جدا و حسيت انه استاهل كل المجهود و المصاريف و يستاهل اكتر من كدة كمان

زى ما قلت دى المرحلة الاولى... المرحلة التانية هى تغيير الماستر ان شاء الله و انا بس لسة بشوف الدنا فيها ايه لان الماستر الاصلى ناقص و ناس بتقول غالى اوى و فيه تايوانى ب 350 جنية و ناس قالت مش قد كدة و فيه استيراد بحوالى 250 جنية فا لسه مش عارف حجيب ايه

واحد يقولى يا كابتن لطيف طيب ليه حتغير الماستر طالما بتقول الفرامل حلوة؟

اقولة الفرامل فعلا حلوة و زى الفل بس لما تركب كالبر اكبر على نفس الماستر حتلاقى مشوار الدواسة بقى طويل و حتحس ان البدال واطى و دة احساس طبيعى لان الماستر دلوقتى بيملا فراغ اكبر من العادى... الفرامل حتشتغل و كل حاجة بس حتحتاج تعود رجلك شويه على المشوار الاطول

انا مش مسئول عن اى مشاكل او اضرار تحصل لا قدر الله لو حد قرر انه يعمل زى ما انا عملت... اللهم بلغت اللهم فاشهد

المواضيع المتشابهه
الموضوع	كاتب الموضوع	المنتدى	مشاركات	آخر رد
متعهـ في تعديل سيارة تاهو جديد 2008 ..	NEO	السرعة السيارات والدراجات	0	08-04-2009 09:27 AM
مكســيما معـدلة . >> تعديل مو طبيعي ..	NEO	السرعة السيارات والدراجات	0	08-02-2009 04:03 PM
موستينج ازرق معدل تعديل خطير بمحرك v8 توين توربو يولد 900 حصان	NEO	السرعة السيارات والدراجات	1	07-31-2009 01:59 PM

		نجاح نت > المنتديات الرياضية > السرعة السيارات والدراجات
تعديل الفرامل الامامية اللانوس

اسم العضو		حفظ البيانات؟
كلمة المرور

الذين يشاهدون محتوى الموضوع الآن : 1 ( الأعضاء 0 والزوار 1)

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة قوانين المنتدى

تعريف :